Flestir ættu að kannast við ljónslappa sem vex villtur um allt land. Hann er ekki bara fallegur þar sem hann lífgar upp á hraun og mela, hann er líka fallegur í steinhleðslur og steinhæðir í görðum. Blómin eru ekki mjög skrautleg, en ljósgrænn liturinn fer vel með öllum öðrum litum. Svo er ekki síður prýði af laufinu, sem er fallega gljáandi grænt og silfrað á neðra borði. Harðgerð planta sem gerir engar kröfur aðrar en að sjá til sólar part úr degi, en veður þó ekki um allt.