Dvergaskór er falleg garðplanta með heiðgulum sérkennilega pokalaga blómum. Laufblöðin eru öll í jarðlægri hvirfingu, svo það þarf að gæta þess að planta honum framarlega í beði svo þau verði ekki undir hávaxnari blómum. Hversu háir blómstönglarnir verða ræðst svolítið af því hversu næringarrík moldin er. Í góðri mold geta þeir orðið allt að 70-80 cm á hæð og hættir þá til að leggjast út af í rigningu. Hann þarf frekar vel framræstan jarðveg, en þolir þó ekki mikinn þurrk. Yndisfögur planta frá Andesfjöllum S-Ameríku.