'Pink Dwarf' er vissulega bleik en alls enginn dvergur. Þetta er yndisfagurt yrki af mjólkurklukku sem blómstrar sínum fögru bleiku klukkum í massavís. Hún er því virkilega tilkomumikil í blóma og í miklu uppáhaldi hjá mér. Hún er hávaxin og þarf stuðning og frekar sólríkan stað til að fegurð hennar fái notið sín til fulls.
Ég sáði til hennar af fræi frá Thompson & Morgan. Hún hefur reynst harðgerð hjá mér og lifði þá þrekraun af að flytja í nýjan garð og kúldrast í kös í geymslubeði í fjögur ár.
Takk, það væri gaman Rannveig, en ekkert liggur á. Hún þarf að ná sér vel á strik hjá þér áður.
Leitt að hún skildi ekki finna sig í móanum. Það er ekki útilokað að ég gæti gaukað að þér nýjum anga ef þú vilt prófa aftur, hún er að ná sér á strik eftir flutninginn.
Yndislega falleg💖. Mig minnit að ég hafi fengið plöntu af mjólkurklukku hjá þér fyrir mörgum árum og plantað henni í Jarphaga. Því miður virðist hún hafa horfið. Líklegt að hún hafi ekki fengið nógu gott nesti hjá mér.