Centaurea dealbata - Silfurkornblóm

Silfurkornblóm er hávaxin planta sem myndar breiðan brúsk af fjaðurskiptu laufi sem er silfrað á neðra borði. Blómin eru purpurableik og ná ekki hátt upp úr blaðbrúskinum. Það þarf góðan stuðning, annars leggst allur brúskurinn út af. Það vex best á sólríkum stað í vel framræstum, frekar rýrum jarðvegi. Það er mjög þurrkþolið, en þolir illa blautan jarðveg. Það þarf góð skilyrði til að ná að blómstra, það blómstrar seint í ágúst og fram í september. Það blómstraði ekkert kalda og blauta sumarið 2018.