Tíbetblágresi er smávaxin fjallaplanta sem vex villt í grjótskriðum í fjöllum Tíbet. Það þarf malarblandaðan jarðveg og sólríkan stað til að þrífast vel og blómstra. Það var tregt til að blómstra framan af hjá mér en tók svo við sér og blómstraði í nokkur ár. Það hefur ekki alveg fundið sig eftir flutning og er ekki farið að blómstra á nýja staðnum. Laufið myndar jarðlæga breiðu og er grænt með ljósgrænum flekkjum og rauðleitum blaðjöðrum, svo það er fallegt þó það standi ekki í blóma. Blómin eru nokkuð stór, sterkbleik með ljósari miðju. Það hefur reynst þokkalega harðgert hjá mér og lifað í mörg ár.