Turnskjöldur er hávaxin planta sem vex villt í raklendi í N-Kína og Mongólíu. Hann vex þó alveg í venjulegri garðmold. Flestir skildir (Ligularia) eru með óskipt laufblöð sem eru oft mjög stór, en laufið á turnskildi er fínskipt sem gefur honum mun fínlegra yfirbragð. Blómstönglarnir eru næstum svartir sem er flott andstæða við gul blómin. Hann verður vel yfir meter á hæð en stendur alveg óstuddur. Hann vex í sól eða hálfskugga. Harðgerð og auðræktuð planta.