Jósefsstigi er falleg tegund sem blómstrar snemma, seinnipart maí og fram í júní. Blómin eru bláfjólublá, heldur minni en á jakobsstiga, með gulu blómgini. Blómstönglarnir leggjast niður, svo hann verður ekki hár í loftinu, en myndar fallega breiðu af bláum blómum. Hann vex villtur í fjalllendi í vestanverðri N-Ameríku og þarf því gott frárennsli og sólríkan stað. Ég keypti þessa plöntu sem dvergastiga, en eftir ýtarlegt gúggl er ég nokkuð viss um að hún hafi verið jósefsstigi. Hann lifði í nokkur ár og blómstraði mikið, en hvarf svo.