Klasarós (Floribunda)
'Campfire' er kanadísk klasarós sem var ræktuð í Morden tilraunaræktunarstöðinni í Kanada. Hún er því mjög frostþolin, ekki síst miðað við flestar klasarósir. Hún blómstrar fylltum blómum sem eru gul með bleikum jöðrum þegar þau springa út, en guli liturinn fölnar með tímanum og verður kremhvítur. Ef lofthitinn er nægur breiðist bleiki liturinn út og blómin verða að mestu bleik, en þar sem það er yfirleitt það svalt hér þá verða þau frekar kremhvít eða fölbleik með bleikum jöðrum. Hún er mjög frostþolin og getur vel lifað úti undir suðurvegg.