Hvítþinur
Hvítþinur er sígrænt barrtré af þallarætt (Pinaceae) með löngu, mjúku barri sem er ljósgrænt í fyrstu en fær svo blágrænan blæ. Þetta er stórvaxið tré sem getur náð 40 m hæð í heimkynnum sínum í vestanverðri N-Ameríku, en verður kannski ekki alveg svo hátt hér á landi. Kannski nær 10 - 20 m. Hægt er að stýra vextinum með klippingu síðvetrar.
Mín reynsla af þessari tegund er ekki löng, ég keypti plöntu 2017 sem hefur dafnað ágætlega, en missti toppsprotann síðastliðinn vetur. Hann á eftir að mynda nýjan, en mér skilst að það muni gerast.
Kjöraðstæður er frekar skjólsæll staður í sól eða hálfskugga, en hann er þó nokkuð skuggþolinn. Best kann hann við sig í veiksúrum, vel framræstum jarðvegi sem er frjór og sendinn eða malarblandaður.
Myndin er tekin af fallegum hvítþin í Nátthaga í Ölvusi núna í september síðastliðnum.
Hafið þið reynslu af þessari tegund sem þið viljið deila hér?