Stafafura
Stafafura er furutegund sem er mikið notuð í skógrækt, en hentar síður sem garðtré vegna stærðar. Hún getur orðið allt að 10 - 25 m á hæð. Hún er harðgerð og á það til að sá sér út þar sem skilyrði eru góð. Hún vex best á sólríkum stað í vel framræstum, djúpum jarðvegi. Það er mikilvægt atriði þegar trjám er valinn staður að jarðvegsdýptin sé næg til að tréð nái góðri fótfestu. Í mínum gamla garði óx stór stafafura sem fauk um koll í óveðri nokkrum árum eftir að við fluttum í húsið. Lóðin var öll á hrauni sem jarðvegi hafði verið jafnað yfir og á flestum stöðum var varla skófludýpt niður á hraunið. Það var því takmörkuð rótfesta fyrir tréð og krónan orðin stór og þung og því fór sem fór. Sem betur fer lagðist það á grasflötina, ekki húsið.